Тараз қаласында қоғамдық қауіпсіздікті қамтамасыз ету, жол-көлік оқиғаларының алдын алу және құқық бұзушылықтарға дер кезінде тосқауыл қою бағытында заманауи бейнебақылау жүйелерінің маңызы артып келеді. Қала көшелерінде тәулік бойы жұмыс істейтін камералар қоғамдық тәртіпті бақылап қана қоймай, адам өмірі мен денсаулығына қауіп төндіретін жағдайларды анықтауға мүмкіндік береді.
Осындай жағдайдың бірі 3 қараша күні Тараз қаласында тіркелді.
Түнгі сағат 01:29 шамасында Тәуке хан көшесіндегі «Қазақ хандығы» монументінің алдындағы тұрақ алаңында Жамбыл облысы Полиция департаментінің Жедел басқару орталығының бейнебақылау инспекторлары ВАЗ-21099 маркалы автокөлігінің жанында тұрған бес ер адамның күдікті әрекеттерін байқайды.
Жағдайға назар аударған инспекторлар ақпаратты дереу жақын маңдағы полиция жасағына жеткізді. Оқиға орнына жеткен тәртіп сақшылары тексеру жүргізу барысында 21 жастағы жүргізушінің алкогольдік масаң күйде екенін анықтады.
Құқық бұзушылықтың жолы кесіліп, автокөлік арнайы айып тұрағына қойылды. Сот шешімімен жас жүргізуші 7 жыл мерзімге көлік құралдарын басқару құқығынан айырылып, әкімшілік қамауға алынды.
Бұл оқиға – заманауи технологиялар мен полиция қызметкерлерінің үйлесімді жұмысының нақты нәтижесі. Егер бейнебақылау инспекторлары күдікті әрекетті дер кезінде байқамағанда, мас күйдегі жүргізуші жолға шығып, жол қозғалысына қатысушылардың өмірі мен денсаулығына қауіп төндіруі мүмкін еді.
Тараз – қауіпсіз қала. Бұл ұстаным тек ұран емес, қала тұрғындарының тыныштығы мен қауіпсіздігін қамтамасыз етуге бағытталған жүйелі жұмыстың көрінісі. Қоғамдық орындарда, көшелер мен жол қиылыстарында орнатылған бейнебақылау камералары құқық бұзушылықтардың алдын алуға, күдікті жағдайларды жедел анықтауға және полиция қызметкерлерінің әрекетін үйлестіруге мүмкіндік береді.
Жамбыл облысы Полиция департаментінің Жедел басқару орталығы тәулік бойы жұмыс істеп, қала аумағындағы қоғамдық тәртіп пен жол қозғалысы қауіпсіздігін бақылауда ұстайды. Бейнебақылау жүйесі арқылы анықталған әрбір күдікті жағдай тиісті қызметтердің назарынан тыс қалмайды.
Қауіпсіз қала қалыптастыру – тек полицияның ғана емес, әрбір тұрғынның ортақ міндеті. Әсіресе, көлік тізгініне мас күйде отырудың салдары орны толмас қайғыға әкелуі мүмкін екенін әрбір жүргізуші түсінуі тиіс.
Есіңізде болсын: мас күйде көлік басқару – өз өміріңізге ғана емес, айналаңыздағы адамдардың өміріне де төнген қауіп.
Тараз көшелеріндегі қауіпсіздік тәулік бойы бақылауда. Заманауи технологиялар, қырағы мамандар және тұрғындардың жауапкершілігі – қауіпсіз қаланың басты кепілі.
