Оқиға сәті әлеуметтік желілерде тараған бейнежазбадан анық көрінеді.
Тиісті лауазымдар
Жамбыл облысында бірнеше ер адамнан құралған топ қызды көпшіліктің көзінше көлікке күштеп отырғызып, алып қашқан.
Полицияның мәліметінше, қыз біраз уақыттан кейін босатылған және ешқандай жарақат алмаған. Дегенмен, бұл дерек бойынша ҚР Қылмыстық кодексінің 125-бабы — «Адам ұрлау» бойынша қылмыстық іс қозғалды.
Облыстық полиция департаменті бұл жағдай әлеуметтік желілерді мониторингтеу кезінде анықталғанын мәлімдеді.
— Аталған факті бойынша тексеру жүргізіліп, нәтижесінде оқиғаға қатысы бар барлық тұлғалар анықталып, тергеуге алынды. ҚР Қылмыстық кодексінің 125-бабы — «Адам ұрлау» бойынша сотқа дейінгі тергеу басталды. Тараптардың бұрыннан таныс болғаны және өзара шағымдары жоқ екені анықталды, — делінген полиция департаментінің хабарламасында.
Алдын ала болжам бойынша, оқиға тұрмыс құру мақсатында жасалған «алып қашу» әрекетіне байланысты болуы мүмкін.
Айта кетейік, биыл «Адам ұрлау» бабына қатысты жаза күшейтілген. Енді мұндай қылмыс жасағандар жеті жылға дейін бас бостандығынан айырылуы мүмкін.
Қазір бұл іс бойынша сотқа дейінгі тергеу амалдары жалғасып жатыр.
