Жамбыл облысында күзгі дала жұмыстары қарқынды жүріп жатыр. Биылғы жылы аймақта ауыл шаруашылығы дақылдары 640 мың гектар алқапқа орналастырылды. Бұл көрсеткіш өткен жылмен салыстырғанда 14 мың гектарға артып, өңірдің аграрлық әлеуетінің тұрақты өсіп келе жатқанын көрсетеді.
Ауыл шаруашылығы басқармасының мәліметінше, дәнді және дәнді-бұршақты дақылдар 362 мың гектарға егілсе, майлы дақылдардың көлемі 38 мың гектарды құрады. Сондай-ақ 31,1 мың гектарға көкөніс, 12,7 мың гектарға бақша өнімдері, 8,2 мың гектарға картоп, 6,6 мың гектарға қант қызылшасы орналастырылды. Мал азығына да айрықша көңіл бөлініп, оның көлемі 181,3 мың гектарға жетті. Бұл – мал шаруашылығын қолдау үшін аса маңызды қадам.
Шілде айында басталған жиын-терін жұмыстары қазір өз нәтижесін беріп отыр. Облыс диқандары масақты дәнді дақылдардың 311,1 мың гектарын жинап, 462,1 мың тонна өнім қамбаға құйды. Оның ішінде бидай көлемі – 201,5 мың тонна болса, арпа 260,6 мың тоннаға жетті. Бұл көрсеткіштер биылғы жылды өнімді жыл ретінде бағалауға негіз береді.
Тек дәнді дақылдар ғана емес, көкөніс-бақша өнімдерінің де түсімі мол. Қазіргі таңда облыста 58,2 мың тонна картоп, 334,4 мың тонна көкөніс, 3,2 мың тонна майлы дақылдар және 336,1 мың тонна бақша өнімі жиналды. Бұл көрсеткіштер жергілікті халықты сапалы әрі қолжетімді өніммен қамтамасыз етіп қана қоймай, экспорттық әлеуетті де арттыруға мүмкіндік береді.
Тиісті лауазымдар
Облыс шаруалары тек егін жинаумен шектелмей, алдағы қыстақ маусымына да белсенді дайындалуда. 2025–2026 жылдардағы мал қыстату науқанына қажетті жем-шөп қоры қазірден бастап әзірленіп жатыр. Бүгінге дейін 1,7 миллион тонна пішен дайындалып, 113,4 мың тонна пішендеме мен 408,7 мың тонна сабан қамдалды. Бұл көрсеткіштер қыс мезгілінде мал азығының тапшылығына жол бермеуге сеп болады.
Мамандардың айтуынша, биылғы жылы Жамбыл облысында ауыл шаруашылығы өнімдерінің жалпы көлемі 3,8 миллион тоннаға жетеді деп жоспарланып отыр. Бұл – өңірдің ауыл шаруашылығындағы жоғары әлеуетін және диқандардың еңбегін айқын көрсететін маңызды көрсеткіш.
Аграрлық сала өкілдері қол жеткізілген жетістіктерді жүйелі мемлекеттік қолдау шараларымен байланыстырады. Соңғы жылдары мемлекет тарапынан ауыл шаруашылығына көрсетіліп отырған субсидиялар, жеңілдетілген несие бағдарламалары мен жаңа техникаларды сатып алу үшін жасалған жағдайлар еңбек өнімділігін арттыруға жол ашты.
Облыс диқандарының айтуынша, биылғы ауа райы да өнімнің мол болуына қолайлы әсер еткен. Уақытылы жауған жаңбыр мен жаңа технологияларды қолданудың арқасында өнім сапасы жоғары деңгейде қалып отыр. Сонымен қатар, агротехникалық талаптардың сақталуы, тыңайтқыштарды тиімді пайдалану және су үнемдеу технологияларын енгізу көрсеткіштердің артуына ықпал етті.
Жалпы, Жамбыл облысында жүріп жатқан егін жинау науқаны – аймақ экономикасының маңызды бөлігі. Алдағы апталарда қалған алқаптардағы өнім де қамбаға құйылып, өңір диқандары елдің азық-түлік қауіпсіздігін қамтамасыз етуге қомақты үлес қоспақ.
