Жамбылдық тәртіп сақшылары бір күнде 600-ден астам жол қозғалысы ережелерін бұзу дерегін анықтады

Осылайша 30 автокөлік арнайы айып тұрағына қойылды

Жамбыл облысындағы рейдтік іс-шаралардың  алғашқы күнінде полицейлер 600-ден астам жол қозғалысы ережелерін бұзу деректерін анықтады.

Жол қауіпсіздігін күшейту мақсатында аймақта «Қауіпсіз жол» республикалық жедел алдын алу іс-шарасы өткізілуде.

Рейдтік шараның алғашқы күні полицейлер Жол қозғалысы ережелерін  бұзудың 626 дерегін анықтаған. Оның ішінде мас күйде көлік жүргізген 4 азамат ұсталған.

-Қауіпсіздік белдіктерін пайдалану ережелерін сақтамағаны үшін — 82 көлік жүргізуші, маневр жасау ережелерін бұзғаны үшін — 33 жүргізуші, сондай-ақ көлік құралын басқару кезінде ұялы телефонды пайдаланғаны үшін 24 жүргізуші әкімшілік жауапкершілікке тартылды, — деді Жамбыл облысы ПД ЖПҚБ бастығының орынбасары Орынбасар Жалдығараев.

Сонымен қатар, рейд барысында жолаушыларды заңсыз тасымалдаудың -3 дерегі, жолаушыларды, багажды және жүктерді тасымалдау ережелерін бұзудың 5 дерегі анықталды. 30 автокөлік арнайы айып тұрағына қойылды.

Жамбыл облысының Полиция департаменті жүргізушілерге Жол қозғалысы ережелерін  қатаң сақтау қажеттігін ескертеді.