Жамбыл облысының әкімі Ербол Қарашөкеев Шу ауданына жұмыс сапарымен барып, аудан тұрғындарымен кездесу өткізді. Кездесу барысында өңірдің әлеуметтік-экономикалық даму көрсеткіштері, жүзеге асырылып жатқан жобалар мен алдағы кезеңге арналған міндеттер талқыланды.
Аймақ басшысы өз сөзінде облыс экономикасында оң өсім сақталып отырғанын атап өтті. Оның айтуынша, 2026 жылдың алғашқы төрт айының қорытындысы бойынша жалпы өңірлік өнім көлемі 3,3 трлн теңгеге жетіп, өсім 4,9 пайызды құраған.
Сондай-ақ экономиканың негізгі салаларында тұрақты даму байқалады. Атап айтқанда, өнеркәсіп өндірісінің көлемі 20,6 пайызға, құрылыс жұмыстары 27,3 пайызға, көлік саласы 17,5 пайызға және сауда көлемі 4 пайызға артқан.
Инфрақұрылымды дамыту бағытында да ауқымды жұмыстар қолға алынған. Облыс бойынша елді мекендердің барлығы сапалы ауыз сумен қамтамасыз етілсе, тұрғындардың 91,8 пайызы табиғи газға қол жеткізген. Электр желілерін жаңғырту және коммуналдық жүйелердің тозуын азайту жұмыстары кезең-кезеңімен жүзеге асырылуда.
Шу ауданында да әлеуметтік-экономикалық көрсеткіштер оң нәтижелер көрсетуде. Жыл басынан бері негізгі капиталға тартылған инвестициялар көлемі 108,3 миллиард теңгені құрап, нақты көлем индексі 361,1 пайызға жеткен. Бұл ауданға инвесторлар қызығушылығының жоғары екенін және инвестициялық жобалардың жүйелі түрде жүзеге асырылып жатқанын көрсетеді.
Бүгінде ауданда жалпы құны 1 триллион теңгеден асатын 33 инвестициялық жоба жүзеге асырылуда. Оның ішінде 10 жоба іске қосылып, 11 жоба бойынша құрылыс жұмыстары жүргізілуде. Аталған бастамалар жаңа жұмыс орындарын ашуға және ауданның өндірістік әлеуетін арттыруға мүмкіндік береді.
Тиісті лауазымдар
Шу ауданындағы маңызды жобалардың бірі – республикалық маңызы бар «Шу – Қайнар» автожолын күрделі жөндеу. Құны 21 миллиард теңгені құрайтын жобаның аясында жолдың 56 шақырымы жаңғыртылуда. Бұл көлік қатынасының сапасын арттырып, тұрғындардың жүріп-тұруына қолайлы жағдай жасайды.
Білім беру саласында биыл 9 жоба жүзеге асырылуда. Оның ішінде үш мектепке күрделі жөндеу жүргізілсе, Жайсан және Жаңақоғам ауылдарында жаңа мектептер салынып жатыр. Сонымен қатар төрт білім нысанына қосымша ғимараттар тұрғызылуда.
Кездесу барысында облыс әкімі өткен жылы берілген бірқатар тапсырмалардың орындалу барысын сынға алып, жауапты сала басшылары мен аудан әкімінің орынбасарларына нақты тапсырмалар берді. Әсіресе заңсыз құм өндіру фактілері, Шу қаласының бас жоспарына өзгерістер енгізу жұмыстарының кешеуілдеуі, Отбасын қолдау орталығын ғимаратпен қамтамасыз ету мәселелері көтерілді.
— Мен әлеуметтік желілерде жарияланатын бейнематериалдарды тұрақты түрде бақылап отырамын. Шу ауданында тұрғындар тарапынан жиі көтерілетін өзекті мәселелердің бірі – заңсыз құм карьерлері мен құм өндіру деректері. Сондықтан бұл заңсыз әрекеттерге тосқауыл қойып, аталған бағыттағы жұмыстарды жүйелеу және бақылауды күшейту қажет,-деді облыс әкімі.
Сұрақ-жауап бөлімінде тұрғындар ауылішілік көшелерді жөндеу, орталық стадионды жаңғырту және спорт алаңшаларын көптеп салу, жарық мәселесін, инфрақұрылымды жақсарту секілді мәселелерді көтерді. Облыс әкімі әрбір сұраққа жан-жақты жауап беріп, көтерілген ұсыныстар мен өтініштердің назардан тыс қалмайтынын жеткізді.
Жиын соңында Ербол Қарашөкеев азаматтарды жеке мәселелерімен қабылдады.
