Қауіпсіз қоғам қалыптастыру – бүгінгі күннің маңызды міндеттерінің бірі. Әсіресе, өскелең ұрпақтың өмірі мен денсаулығын қорғау, олардың құқықтары мен заңды мүдделерін қамтамасыз ету, жасөспірімдер арасында құқық бұзушылықтың алдын алу – баршаға ортақ жауапкершілік.
Осы бағыттағы жұмыстарды жандандыру мақсатында 2026 жылғы қараша айында Тараз қаласында «Тараз – қауіпсіз қала!» атты профилактикалық айлық өтті. Аталған бастама қоғамда қауіпсіздік мәдениетін қалыптастыруға, құқықтық сауаттылықты арттыруға және балалар мен жасөспірімдер үшін қолайлы әрі қауіпсіз орта құруға бағытталған.
Айлық аясында қала мектептерінде білім алушылардың қауіпсіздігін қамтамасыз ету, құқықтық мәдениетін қалыптастыру және түрлі келеңсіз жағдайлардың алдын алу бойынша кешенді жұмыстар жүргізілуде. Атап айтқанда, жасөспірімдер арасындағы құқық бұзушылық, буллинг, зорлық-зомбылық, нашақорлық және өзге де зиянды әдеттердің алдын алуға ерекше назар аударылуда.
Жоспарға сәйкес, білім беру ұйымдарында құқықтық түсіндіру жұмыстары, профилактикалық кездесулер, танымдық семинарлар мен форумдар, сауалнамалар, спорттық іс-шаралар және рейдтік жұмыстар ұйымдастырылады. Мұндай шаралардың басты мақсаты – оқушылардың құқықтық сауаттылығын арттырумен қатар, олардың бойында жауапкершілік, өзара сыйластық, тәртіп пен адамгершілік қасиеттерін қалыптастыру.
Әсіресе, буллинг пен кибербуллингтің алдын алу мәселесі айрықша маңызға ие. Себебі бала қауіпсіздігі тек мектеп қабырғасындағы тәртіппен шектелмейді. Ол – отбасындағы тәрбие, қоғамдық ортадағы қарым-қатынас және цифрлық кеңістіктегі мәдениеттің өзара сабақтастығы. Сондықтан оқушыларға өз құқықтарын білу, өзгенің құқығын құрметтеу, қандай да бір қысым немесе қауіп төнген жағдайда тиісті мамандардан көмек сұрау қажеттігі түсіндіріледі.
Сонымен қатар салауатты өмір салтын насихаттау, спортқа баулу және бос уақытты тиімді ұйымдастыру да профилактикалық жұмыстың маңызды бөлігі болып табылады. Өйткені спорт пен шығармашылыққа бейім, қоғамдық өмірге белсенді араласатын жасөспірімнің тұлғалық дамуына оң ықпал ететін мүмкіндіктер мол.
Айта кету керек, балалардың қауіпсіздігін қамтамасыз ету тек мектеп ұжымының ғана міндеті емес. Бұл бағытта ата-аналар, педагогтер, құқық қорғау органдары және қоғам мүшелері бірлесе әрекет еткенде ғана нәтижелі жұмыс жүзеге асады. Әрбір ата-ананың бала тәрбиесіне жауапкершілікпен қарауы, әрбір педагогтің оқушының психологиялық жағдайына назар аударуы, әрбір азаматтың қоғамдық тәртіпті сақтауға үлес қосуы – қауіпсіз ортаның берік негізі.
«Тараз – қауіпсіз қала!» айлығы – бір айлық шаралар жиынтығы ғана емес, ол – қоғамда қауіпсіздік мәдениетін орнықтыруға бағытталған маңызды бастама. Оның нәтижесі әрбіріміздің белсенділігіміз бен жауапкершілігімізге байланысты.
Өйткені қауіпсіз мектеп – қауіпсіз балалық шақтың кепілі, ал қауіпсіз орта – жарқын болашақтың негізі.
Балалардың қауіпсіздігі – баршамызға ортақ жауапкершілік! Бірлесе әрекет етіп, құқықтық мәдениеті жоғары, тәртіпті әрі қауіпсіз қоғам қалыптастырайық!
