Жамбыл облысына жаңа өкіл имам тағайындалды

Дін саласы аса нәзік, ұқыптылықты қажет ететін, руханияттың өзегі болған маңызды бағыт. Осы орайда, дін мамандарының жан-жақты, білікті болуы басты талап. Еліміздегі діни ахуалды реттеп отыру үшін де имамдар, ұстаздар түрлі өңірлерде қызмет жасап, діннің сан саласында еңбек етуі шарт.

Осы мақсатта, Қазақстан мұсылмандары діни бақармасының Жамбыл облысындағы өкілі, «Һибатулла Тарази» мешітінің бас имамы, медресе директоры Данияр қажы Жұмабаевтың Алматы қаласы Бостандық ауданы «Бәйкен» мешітіне ауысқаны жайлы алдыңғы жаңалықтарда хабарлаған болатынбыз. Данияр қажы Әлимұхаммедұлы Жамбыл облысында 8 жылға жуық уақыт белсенді қызмет жасап, өз еңбегін сіңірді.

Ал бүгінде Жамбыл облысының рухани жүрегі «Һибатулла Тарази» мешітіне және ҚМДБ-ның Жамбыл облысындағы өкіл имамы қызметіне Қанат Жұмағұлов тағайындалды. Облысқа діни көшбасшыны тағайындауға ҚМДБ-ның Бірінші төраға орынбасары, наиб мүфти Өтпенов Наурызбай Тағанұлы арнайы келді. Сонымен қатар, бұл айтулы іс-шараға Жамбыл облысы Дін істері басқармасының басшысы Жангелді Омаров қатысты. Наурызбай Тағанұлы жамағатты Бас мүфтидің бұйрығымен таныстырып, Қанат Жұмағұловты жаңа қызметімен құттықтады. Жұма намазана жиналған көпшілік алдында Жангелді Омаров сөз сөйлеп, имамдарға сәттілік тілесті. Күндердің сұлтаны күні оқылатын жұма намазын наиб мүфти Өтпенов Наурызбайдың өзі жүргізіп, дұға жасады. Ал осы облыста өкіл имам қызметін атқарып келген Данияр Жұмабаевқа Бас мүфтидің атынан Алғыс хат, Жамбыл облысы әкімінің атынан марапат қағазы табысталды. Данияр қажы Жұмабаев жамағатқа сүбелі сөз сөйлеп, ауызбіршілік, ынтымақ туралы насихат айтты. Сондай-ақ, жамағат атынан Данияр қариға қазақтың дәстүрлі шапаны жабылды.

Өкілдік қызметіне келген имамға ұжымы жемісті әрі нәтижелі жұмыс, ырыс-береке тілейді.

 

Ақерке БЕКҚҰЛОВА,

«Һибатулла Тарази» мешітінің баспасөз қызметі.