Таңдаулы жаңалықтар:

ШЫМКЕНТТЕ МЕМЛЕКЕТТІК БІЛІМ БЕРУ БАҒДАРЛАМАСЫ ТАБЫСТЫ ЖҮЗЕГЕ АСУДА

Мемлекет басшысының тапсырмасы аясында Шымкент қаласында білім беру инфрақұрылымы дамуда. «Тұран» шағын ауданындағы жаңадан пайдалануға берілген №79 жалпы орта мектебінің мерекеге арналған «Тәуелсіздік жетістіктері» атты салтанатты жиынында қала әкімі Мұрат Әйтенов осылай деді.

Барша ұстаздар мен шәкірттерді Білім күнімен және жаңа мектептің ашылуымен құттықтаған қала басшысы мектеп табалдырығын алғаш рет аттап отырған бірінші сыныптың бүлдіршіндеріне сәттілік тілеп, оларға әліппе табыстады.

«Биылғы жаңа оқу жылы Қазақстан Республикасы Тәуелсіздігінің 30 жылдық мерейтойы қарсаңында басталғалы отыр. Тәуелсіздік жылдарында Шымкент қаласының білім саласы үлкен жетістіктерге жетті. Осыдан отыз жыл бұрын қалада 69 мың оқушысы бар 72 мектеп болса, қазір 233 мыңнан аса оқушы оқитын 203 мектеп бар. Биылғы оқу жылында қала мектептері 233 879 оқушымен бастағалы отыр. Өткен жылмен салыстырғанда 8 мың оқушыға көп. Оның ішінде 25 мың оқушы алғаш рет мектеп табалдырығын аттап отыр», — деді әкім өз құттықтау сөзінде.

Әкім балалардың қауіпсіздігін қамтамасыз ету үшін мектептер видео бақылау жүйсімен жабдықталып, турникеттер қойылып, дабыл батырмалары орнатылғанын, мектептердің материалдық-техникалық базасын нығайту бойынша жұмыстар жүйелі түрде жүргізіліп келетінін айтты. Сонымен бірге жаңа модификацияланған жабдықтармен қамтамасыз ету мақсатында 263 кабинет, 178 интерактивті тақта орнату жұмыстары жүргізілді. Нәтижесінде, жаңа модификацияланған жабдықтармен қамтылған пән кабинеттер үлесі 32,5%-дан 65%-ға жетті. Бұл жұмыстар жалғасын табатын болады.

Қала әкімінің қатысуымен ашылған оқу кешенінде 897 оқушы білім алатын болады. Ауыл қарияларымен бірге жаңа мектепті аралап, ондағы спорт зал, Абай сыныбы, шахмат, еңбек, тігін шерберханалары мен асхананы аралап көрді. Құрылыстың сапасы мен дизайнына мән берген Мұрат Әйтенов мұндағы жұмыстарға оң бағасын берді. Мектеп директорына санитарлық шаралардың сақталуын қамтамасыз етуді тапсырды.

Заман талабына сай жабдықталып, балалардың толыққанды білім алуына, салауатты өмір салтын қалыптастыруына жағдай жасайтын 1200 орындық оқу орны 3 қабаттан тұрады. Екі ауысымда жұмыс жүргізетін мектепте 44 оқу бөлмелері қарастырылған. Бұдан басқа жаңа үлгідегі 8 мультимедиялы-лингофонды кабинет, 3 информатика кабинеттері, ол 85 дана компьютер және 3 интерактивті тақтамен жабдықталған. Сондай-ақ, 4 шеберхана бөлмесі, салауатты өмір салтын қалыптастыруға арналған спорт зал мен балалардың денсаулығын қадағалайтын екі медпункт қарастырылған.

Айта кетейік, пандемияға байланысты алғашқы қоңырау білім табалдырығын алғаш аттаған бүлдіршіндер үшін ғана мектеп ауласында салтанатты жиын өтті, қалған сынып оқушыларына санитарлық талаптарды сақтай отырып сынып сағаты ұйымдастырылды.