Астанада «Қасиетті Қазақ елі» халықаралық өнер фестивалі өтті

Бейбітшілік және келісім сарайында шетелде тұратын отандастарымыздың қатысуымен «Қасиетті Қазақ Елі» халықаралық өнер фестивалі өтті. Оған еліміздің әр өңірінен келген үміткерлерден бөлек, Германия, Франция, Қытай, Ресей, Моңғолия, Түркия сияқты алыс-жақын шетелдерден 50-ден астам қандасымыз қатысты.

Фестивалдің мақсаты – отандастарымыздың шығармашылық және білім әлеуетін арттыру, оларға қатысты маңызды мәселелерді талқылау, туған тіл мен мәдени құндылықтарды игеруі тұрғысынан қазақ диаспорасына әдістемелік және ұйымдастырушылық қолдау көрсету, талантты орындаушыларды анықтау болып табылады. Шара аясында мүшайра, терме және халықтық қолданбалы өнер аталымдары бойынша сайыстар ұйымдастырылды.

Фестивальдің жеңімпаздарын марапаттау рәсіміне Қоғамдық даму министрі Дархан Кәлетаев, «Отандастар қоры» КЕҰ Президенті Нұртай Әбіқаев, Астана қаласы әкімінің орынбасары Ермек Аманшаев қатысты. Қатысушылар алдында Қоғамдық даму министрі Д.Кәлетаев құттықтау сөз сөйлеп, «Қасиетті Қазақ Елі» халықаралық өнер фестивалі Мемлекет басшысы Н.Ә.Назарбаевтың «Болашаққа бағдар: рухани жаңғыру» бағдарламалық мақаласы аясында жүзеге асырылып отырғанын атап өтті.

Қазіргі уақытта әлемнің 43 мемлекетінде 5 миллионнан астам қандасымыз тұрады. Олардың басым бөлігі Қазақстанмен шекаралас елдерде өмір сүреді: Өзбекстан (900 мың адам), Қытай (1,5 млн адам), Ресей (800 мың адам), Түркменстан (65 мың адам), Моңғолия (142 мың адам) және Қырғызстан (33 мың адам).

Пікір қалдыру

Your email address will not be published. Required fields are marked *